„И ние сме луѓе“: Бесими за рекреацијата во канцеларија кај Груби
Министерот за економија Фатмир Бесими во гостување на ТВ21 вечерва беше запрашан околу фотографиите и видеото на кое се гледа како заедно со другите министри од ДУИ, играат фудбал и кошарка во кабинетот на вицерпремиер Артан Груби.
Тој кажа дека „во минатото играл фудбал и дека по работниот ден, како и секој човек, си наоѓа хоби“.
„Спортот е добар за здравјето. Јас сум играл фудбал во училиште. Го следев и светското првенство. На крајот од денот кога ќе го тргнам ова одело како министер, станувам обичен граѓанин како и секој. Граѓаните можеби реагираа што не’ видоа во една невообичаена улога. Јас затоа сакам да упатам и порака дека секој министер, премиер, политичар е и обичен човек, и има исти емоции и грешки како и секој човек. Она што е важно е тоа што ние сме 100% посветени на граѓаните, а имаме право да се релаксираме како секој обичен човек“, рече Бесими.