Како што официјално информираат од клубот, оваа сезона беше последна за Даниел Аврамовски во дресот на Вардар.

25-годишниот играч за врска во нападот ги засили „црвено-црните“ во текот на зимскиот преоден рок во 2019 година од екипата на Олимпија.

Одигра вкупно 41 натпревар со постигнати 12 голови за екипата на Вардар.

– Фудбалскиот клуб Вардар на Даниел, кој беше интегрален дел од минатогодишната шампионска титула му се заблагодарува на досегашната соработка и му посакува многу успех во понатамошната кариера. Благодариме Цујо! – соопштија од ФК Вардар.

До прекинот на сезоната во Првата лига (поради пандемијата на коронавирус) беше најдобар стрелец со 10 голови.

Има настапи за најдобрата македонска репрезентација, а во својата клупска кариера беше дел уште од Работнички, Македонија ЃП, Црвена звезда, ОФК Београд, Олимпија Љубљана и Војводина.

Претходно со екипата се разделија уште Филип Гачевски, Евгениј Новак, Леовигилдо Жуниор Реис Родригез и Кристијан Тошевски.