По објавата на шефот на македонската дипломатија на Твитер, Никола Димитров, стана јасно дека Македонија им се приклучува на повеќето балкански земји кои одлучија  да го бојкотираат вечерашното доделување на Нобеловата награда за литература на австрискиот писател Петер Хандке, поради неговата поддршка на режимот на Милошевиќ.

„Мора да се спротивставиме на негирањето на геноцидот“, порача денеска на Твитер  министерот Димитров.

Тој соопшти дека му дал инструкции на амбасадорот на Македонија во Шведска да не учествува на вечерашната церемонија во Стокхолм.

Genocide denial must be confronted. We instructed the Ambassador of North Macedonia to #Sweden not to take part in the @NobelPrize ceremony for #Handke.

— Nikola Dimitrov (@Dimitrov_Nikola) December 10, 2019

Претходно, Хрватска, Босна и Херцеговина, Косово и Албанија најавија дека ќе ја бојкотираат церемонијата за Хандке поради неговите ставови кон војните на просторите на поранешна Југославија и поддршката која му ја даваше на поранешниот српски претседател Слободан Милошевиќ.

За најголем грев на Хандке се смета негирањето на геноцидот во Босна и Херцеговина, но и на другите злосторства кои се случија во текот на војните.

Шведскиот крал Карл Густаф 16 вечерва ќе му ја предаде наградата на 77 годишниот лауреат на гала банкет на кој ќе присуствуваат 1.200 гости.

Нобеловата академија го нарече Хандке „еден од највлијателните писатели во Европа по крајот на Втората светска војна“.