И кадетките слават полуфинале, во финишот до победа над Финска
Во својот четврти настап на ЕХФ шампионатот во Клаипеда (Литванија) македонската женска кадетска репрезентација стигна и до третиот триумф.
Ова беше решавачки меч за второто место во нашата група во кој македонската селекција предводена од селекторот Љубомир Савевски беше подобра од Финска со 21:20.
Имавме одличен старт од 6:0 и наместо рутински да се одржува оваа висока предност до самиот крај на средбата, падна ритамот во играта, паѓаше концентрацијата во нападите, а тоа го искористи ривалот за израмнување на 9:9, а на пауза се замина со нерешени 11:11.
Во 44 минута повторно се одвоивме на пристојна позитива од плус четири (17:13), но се дозволи повторно противникот да се доближи резултатски, и не само тоа, туку и да поведе во 52 мин. со загрижувачки за нас 17:19.
На три минути пред крајот финските ракометарки имаа минимални 19:20, до крајот на средбата успеавме да ги запреме сите налети на противничкиот тим, најпрвин израмни Коцева, а во финишот судиите досудија седмерец кој го реализиравме преку Дукоска за поставување на конечниот епилог.
Во нашите редови најефикасна беше Е. Ризоска со шест голови, пет запиша Т. Дукоска, а четири Б. Коцева.
На табелата во групата „А2“ Шпанија пред својот последен меч со Литванија е сигурна на првата позиција со шест бодови, колку што има и Македонија на второто место и овие две селекции одат во полуфиналето. Финска заврши на третата позиција со четири бодови, Литванките се претпоследни со два, а без бодови Косово.
За пласман во големото финале в сабота Македонија ќе ги одмери силите против Полска.
Кадетите преку Полска во полуфиналето на ЕХФ шампионатот во Скопје