Хрватскиот музичар и фронтмен на сплитскиот бенд „Смајли“, Игор Нешиќ, вчеравечер загинал во страотна сообраќајка.

Со пејачот во автомобилот биле уште двајца сопатници, кога се судрил со друг автомобил во близина на Сплит изминатата ноќ, објави сплитската полиција, а пренесе хрватски Индекс.

Како што информираат оттаму, сообраќајката се случила 45 минути по полноќ во Дугопоље, кога пејачот возел автомобил сузуки во соодветната лента, а од спротивната доаѓал автомобил пасат, кој поради непознати причини излегол од својата лента и директно се судрил со сузукито. Нешиќ починал веднаш по судирот, на местото на несреќата.

Двајцата сопатници се тешко повредени, од кои еден од нив, како што пишуваат хрватските медиуми, е во критична состојба.

Освен што имал успешна музичка кариера, Нешиќ бил и познат инструктор за јавање.

„Вчера не напушти наш драг и добар колега, пејачот Игор Нешиќ. Инструктор по јавање и вистински љубител на коњи. Драг наш, сега пеј и галопирај по бескрајните небесни патеки и почивај во мир. Сочувство до семејството. Драги колеги музичари и сите ние што возиме особено ноќе, пазете како возете, полека и внимателно“ објавија неговите колеги на Фејсбук.