Тркачката сезона во класата „микромакс“ за Христо Ковачи во 2021 година заврши со вкупно 27 трки.

– Сакам да се заблагодарам на моите родители кои секогаш во се што правам се со мене, целата јавност и сите мои следачи и поддржувачи, медиумите, моите другари и секако мојот единствен спонзор „Мамас“ кој цела сезона ми даде безрезервна подршка – вели Ковачи.

Во Централната Европска Зона од вкупно 33 натпреварувачи Христо е 8-ми, во Австрискиот шампионат 16-ти, во Спорт Стил Купот 8-ми, во Српскиот Шампионат 3-ти, но поради промени во раководството на Српската федерација не се рализира во целост шампионатот за класата микромакс.

– Цела година за нас беше исполнета со многу патувања, нови предизвици, нови другарства, нова стаза и убави моменти кои ќе останат за нас.Постигнатите резултати беа очекувани и задоволни сме што целиот труд резултираше со напредок и подобрување на вештините за возење кај Христо – велат од неговиот тим.

Оваа тркачка сезона започна со прва трка во Италија и заврши во Словенија.

– Зедовме учество во РМЦ Австрија, ЦЕЗ Централна Европска Зона, Српскиот Шампионат и ССЦ Спорт Стил Купот. Вкупно беа предвидени 11 тркачки викенди или 33 трки вкупно од кои 6 трки беа откажани од организаторите, а се одржаа вкупно 27 – дополнуваат тие.

Покрај успесите Христо немаше посериозни инциденти освен една незавршена трка поради технички дефект на моторот, и за жал 9 пропуштени трки од здраствени причини поради кои беа испуштени најмалку 3-4 позиции во генералниот пласман.

– Следната година Христо ќе има нов и уште посериозен предизвик. Според неговата возраст и тоа како се поделени класите на натпреварувачите, треба уште две сезони да биде во оваа класа, но поради висината и килограмите ќе мора да оди во поголемата класа. Таа класа е составена пред сè од поголеми, далеку позрели и поискусни натпреварувачи и веројатно Христо ќе биде најмал меѓу најголемите. Сепак ова ќе биде мотив за нас за повеќе тренинзи и можност да се надогради себе си справувајќи се со своите конкуренти – велат од неговиот тим.

Во наредниот период ќе биде објавен календарот на трки според кој ќе се види во кои шампионати Христо ќе учествува идната 2022 година.

– Сепак останува особено важно да учествува во шампионати каде ќе има повеќе натпреварувачи во неговата нова класа со цел стекнување поголемо искуство, знаење и подобрување на неговите вештини за возење – додаваат од неговиот тим.