Актерката Тејтум О‘Нил се заканувала дека ќе си го одземе животот во својот дом во Лос Анџелес, по што полицијата ја одвела во локалната болница, пренесува ТМЗ.

По телефонски повик во кој полицијата била известена дека лице се заканува со самоубиство, тие дошле во домот на педесет и шестгодишната актерка Тејтум О‘Нил и итно ја пренесле во локалната болница. Потоа таа е префрлена на психијатрискиот оддел каде што е под постојан стручен надзор.
Иако драмата се одиграла кон крајот на минатиот месец, дури сега се дозна за оваа случка.

Тејтум О‘ Нил беше голема детска ѕвезда и на свои 10 години стана најмладата личност што освоила „Оскар“ , а наградата ѝ ја донесе улогата во филмот „Месечина од хартија“ каде што глумеше покрај татко ѝ Рајан О‘Нил.

Која е причината за ваквиот испад на Тејтум, сè уште не е јасно, но се претпоставува дека индиции за такво нешто можеле да се насетат по нејзината објава на Инстаграм, каде што откри дека како мала била сексуално злоупотребувана од пријател на татко ѝ, но и од еден од многубројните пријатели на мајка ѝ.

Тејтум која зад себе има еден пропаднат брак со тенисерот Џон Мекенро, во минатото се бореше со зависност од дрога и наводно е чиста од 2008 година.