Холштајн за предизвиците на земјава во наредниот период: Попис, борба против корупција, правна држава, правосудство

Фото: mia.mk

Билатералните проблеми не треба да бидат дел од преговарачката рамка за проширување на Европската Унија (ЕУ), смета германската амбасадорка во земјава, Анке Холштајн. Германската амбасадорка во интервју за Радио Слободна Европа дава коментар на бугарскиот меморандум испратен до земјите-членки на ЕУ, при што напоменува дека Бугарија ги има кажано овие барања на другите земји-членки на почетокот на август.

– Ние и, според моите сознанија, сите други-земји членки се на мислење дека билатерални проблеми не треба да се ставаат во преговарачката рамка и дека билатералните проблеми треба да се решаваат билатерално. Бугарија секогаш беше голем поддржувач на европското придвижување на регионот, вклучувајќи ја и Северна Македонија. Во суштински интерес на Бугарија е да не се блокира процесот за проширување на Европската унија во овој регион, вели Холштајн.

Во врска со тоа дали се реални очекувањата земјава да ги почне преговорите за членство со ЕУ за време на германското претседавање, Холштајн нагласува дека во делот на политиката за проширување, одржувањето на првата меѓувладина конференција, односно официјалниот старт на разговорите за проширување со Северна Македонија е „нашата голема цел која е заедничка цел и на Германија и на Северна Македонија”.

– Треба во рамките на ЕУ да се договориме во однос на преговарачката рамка за која моментално се дискутира во Брисел, кога ќе се постигне договор за тоа, може да дадеме и датум за првата меѓувладина конференција и се надеваме дека тоа ќе се случи во декември, додава германската амбасадорка.

Во однос на преговарачката рамка вели дека таа сега е поцелисходна, дозволува или бара посилно политичко водство преку меѓувладина конференција.

– Поглавјата се отвораат на блокови, досегашните основни критериуми се зајакнуваат, многу клучни изрази во оваа методологија се предвидливи, веродостоен, предвидлив, динамичен, силно политичко управување. Тоа сè се идеи и замисли кои се од корист и земјите членки можат да учествуваат на мониторингот и на известувањето за пристапниот процес, економското владеење се зајакнува и, сосема ново, има можности за мерки за казнена политика ако не се спроведуваат реформите, но има и позитивни стимули со забрзана интеграција во еу политиките и програми како и појака финансиска поддршка. Тоа мислам дека не се потешки, туку појасни услови и останува најважната основа при процесот на пристапување – секоја земја со темпото на реформи го одредува процесот на пристапување, истакнува амбасадорката на земјата претседавач со ЕУ.

Таа во интервјуто нагласува дека земјава во наредниот период треба да се фокусира на правна држава, борба против корупцијата, вклучувајќи ги реформите во правосудството, брзо да се однесе законот за забрана од дискриминација и Изборниот законик да се прилагоди соодветно на препораките на ОБСЕ/ОДИХР.

– Основно за многу области во општествениот живот е пописот кој е планиран за април и Северна Македонија треба да почне да се позиционира за економските предизвици во внатрешната економија, но тоа сè се рефлектира во Владината програма, истакнува Холштајн.

Вели дека конструктивна соработка со опозицијата е во интерес на иднината на државата, а тоа особено важи за европската политика, а за протестите на опозицијата, непосредно по завршувањето на изборите нагласува дека правото на слободно изразување на мислење, на собир и демонстрации секако дека е основно човеково право на секој граѓанин и граѓанка. Но, смета дека да се игра на националистичка карта не носи ништо добро и не е од никаква помош.

Билатералните односи со Северна Македонија ги оценува како извонредни и напоменува дека во во земјава има отприлика 200 германски компании кои создадоа 20 000 работни места.

– Најголем германски работодавач во земјава е „Дрекслермајер“ во Кавадарци што ја посетив пред неколку дена. Фабриката со нивната работа во Северна Македонија е многу задоволна, и од општината и од државата ја добива сета потребна поддршка. Такви успешни примери сè се разбира најдобра реклама за една земја и добри глас на далеку се слуша кога системот добро функционира за една фирма, нагласи германската амбасадорка Холштај во интервјуто за Радио Слободна Европа.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот