Хју Грант: Животот не е романтична комедија
Британскиот актер Хју Грант (60) се прослави на филмското платно со улогите во многу познати романтични комедии како „Nothing Hill“ во 1999 година, „Four Weddings and a Funeral“ во 1994 година, во двата филма за „Bridget Jones“, „Love Actually“ во 2003, „Music and Lyrics“ во 2007 година и многу други.
„Сигурен сум дека мојот и ликот на Џулија поминаа низ најлош можен развод што можете да го замислите, со скапи и корумпирани адвокати. Сите мои врски во филмовите беа всушност катастрофа, а романтичните комедии како жанр се само лага“, неодамна изјави актерот во интервју за списанието „Collider“.
Неговиот најнов проект „The Undoing“ е драматична мини серија во која глуми со Никол Кидман. Актерот и Кидман во серијата се брачен пар со навидум совршен живот кој одеднаш се руши пред очите на гледачот.
Хју за време на промоцијата на тековниот проект даде интересен одговор на прашањето дали повторно би снимал романтични комедии.
„Би сакал да снимам продолженија на моите успешни романтични комедии кои ќе го демистифицираат и уништат тој жанр. Да им покажам на луѓето како завршуваат овие ликови, мислам дека ова е брилијантна идеја“, низ смеа одговори актерот.
Хју вели дека колку е покомплицирана приказната на ликот што го толкува, толку е подобро, затоа што како што вели тој сите актери претпочитаат да играат посложени ликови.