Хет-трик на Несторовски во победата на Удинезе
Во право време доаѓаат овие погодоци на македонскиот репрезентативен напаѓач пред важниот историски натпревар против Косово за пласман на ЕП 2020.
Во пријателски натпревар денеска калчолигашот Удинезе убедливо го совлада нисколигашот Кјарлинс Музане со конечен резултат 13:1.
Македонскиот интернационалец Илија Несторовски запиша три голови (хет-трик), стрелаше во 62., 72. и 76. минута од контролниот дуел.
Кај неговите тимски колеги пет погодоци беа дело на Полјакот Лукаш Теодоричик, четири запиша Аргентинецот Родриго Де Паул, а еден Бразилецот Валас Соуза.
Во право време доаѓаат овие голови на Несторовски кој очекуваме да биде во составот на селекторот Ангеловски за важниот историски дуел во Скопје против Косово за пласман на Европското првенство 2020 година.
Наредниот меч во Серија А екипата од Удине ќе го има в сабота на гостински терен против Торино, доколку евентуално не се дојде до одложување на таа средба.
Сезонава во најсилното италијанско фудбалско првенство во 16 настапи досега нашиот репрезентативен напаѓач има само еден гол во поразот од Сампдорија (2:1).