Обвинителот за воени злосторства на ОВК Џек Смит предупреди вечерва дека кривично ќе ги гони лицата кои ќе го откријат идентитетот на потенцијалните сведоци или ако помогнат во тоа, објави Бета.

Во пишаната изјава по повод тврдењата на Здружението на воени ветерани на ОВК дека непознати лица му доставувале многу документи на судот во Хаг, обвинителот Смит нагласи дека тоа здружение „повеќе пати се впуштало во активности, кои, верувам се насочени кон минирање на соодветната примена на правдата“.

Како што пишува во изјавата која ја пренесе неговиот портпарол Кристофер Бенет, обвинителот забележал дека многу новинари на Косово „јасно рекле дека таквите активности го минираат владеењето на законот и курсот на правдата“.

Со пофалба на новинарите кои одбиле да објават содржини од документите кои ги добиле од Здружението на воените ветерани на ОВК, како и на оние кои тие документи доброволно ги предале во судот, обвинителот назначи дека тие сфатиле дека „учеството во делењето на таквите информации би можело да претставува кривично дело според Кривичниот законик на Косово“.

„Специјалното обвинителство е посветено на истрага и кривично гонење на поединци кои сториле такви кривични дела, вклучувајќи и откривање идентитет на лица кои би можеле да бидат повикани на суд или било какви информации кои можат да доведат до нивна идентификација“, предупреди обвинителот Смит.

(Бета)