Американскиот актер Харисон Форд ќе ја повтори својата култна улога на авантуристот Индијана Џонс во филмската франшиза на „Дизни“, пренесува „Би-би-си“.

Филмот, во режија на Џејмс Манголд, треба да биде петтото и последно продолжение за 78-годишниот актер како Индијана чија премиера е закажана за 29 јули 2022 година. Никој не го спомна Крис Прат, за кого се шпекулираше дека ќе се појави во филмот.

Во едно интервју во 2013 година, Харисон изјави дека е „сосема во ред“ да се врати во улогата на авантуристот.

„Видовме дека карактерот се развива и расте одреден временски период и е сосема соодветно и во ред тој повторно да се врати со одличен филм“, тогаш изјави Форд, нагласувајќи дека Индијана Џонс не мора да биде толку акционен филм.

„За мене, она што беше интересно за ликот беше тоа што тој преовладуваше, имаше храброст, беше духовит, интелигентен, исплашен а сепак успеа да преживее…“, вели Форд.

Актерот прват се појави во „Raiders of the Lost Ark“ во 1981 година, потоа во „Indiana Jones and the Temple of Doom“ во 1984, па во „Indiana Jones and the Last Crusade“ во 1989 година и во четвртото продолжение „Indiana Jones and the Kingdom of the Crystal Skull“ во 2008 година.

Петтото продолжение е во фаза на изработка, со неколку сценаристи се менуваат, но целиот проект забавува поради глобалната пандемија на коронавируси.

„Дизни“ го објави соопштението во виртуелната презентација пред инвеститорите каде ги откри плановите и за продолженија на „Star Wars“ и „Marvel“.