Грчкиот кошаркарски клуб Олимпијакос нема да се натпреварува во плеј офот, ги известил газдата на клубот Јоргос Ангелопулос, своите играчи и тренери.

Според правилникот на Кошаркарската федерација на Грција, Олимпијакос поради повлекување од плеј офот е исфрлен во втората грчка лига, доколку одлучи да се натпреварува следната сезона.

Олимпијакос во плеј офот требаше да игра против големиот ривал Панатинаикос, кој е и причината за повлекувањето од натпреварувањето. Имено, Олимпијакос бараше судиите Тасос Манос и Панајотис Анастопулос да не им судат во дуелите против Панатинаикос, но Федерацијата го одби нивното барање.

Со овој потег на тимот од Атина, се зголемуваат шансите од наредната сезона да се натпреваруваат во регионалната АБА лигата. Раководните лица на тимот веќе одржаа состанок со челниците на ова натпреварување, а им пишаа и на останатите учесници во АБА лигата, писмо со намери за прием во лигата.