Околу 100 луѓе дневно во Германија ги известуваат надлежните органи за нивната желба да го променат административно регистрираниот пол и име од 1 ноември, кога стапи на сила Законот за самоопределување (SBGG). Но, од државата веќе се бара да се справи со „дупките“ кои се создаваат во однос на правдата.

Според новата законска регулатива, граѓанинот може теоретски да регистрира различен пол и ново име на секои 12 месеци. Весникот Билд дури го пренесува сведочењето на 28-годишниот Каспер, која сакајќи да биде регистриран како жена, на 11 ноември ја поднел соодветната пријава до матичната служба во Хамбург.

„Немаше претходна медицинска информација, никаков совет. Пополнив шест формулари, го покажав мојот извод од матичната книга на родените и тоа беше тоа“, вели тој.

Неговиот термин е закажан за 13 февруари за да ја добие новата лична карта, со име „Клара“. Потребни се само десет минути и 35,50 евра, за заверка и за издавање нов извод од матична книга на родените. Сепак, интересното е што 28-годишникот изјавува дека не сака долго да остане жена, туку има намера да поднесе нова апликација и повторно да стане маж и „Каспер“ кога ќе поминат 12-те месеци, со цел да се тестира процесот во пракса.

Според Билд, од 1 ноември до крајот на годината, повеќе од 4.361 лице поднеле соодветни апликации користејќи го новото законодавство. Најмногу апликации се поднесени во Берлин, а потоа следуваат Лајпциг, Келн, Дизелдорф, Дрезден и Бремен.

Некои веќе се обидуваат да ја искористат можноста што им ја дава законот за да не бидат казнети од судовите.

Свен Либич, познат по неговата неонацистичка активност во последната деценија во Саксонија -Анхалт, беше осуден минатиот август на 18 месеци затвор без помилување за поттикнување омраза и клевета.

Како дел од жалбената постапка, тој побара одложување и поднесе барање за промена на полот и името до општина во Саксонија, која го прифати. Во своето ново појавување на суд, Свен Либич сега беше Марла-Свења Либич и рече дека се плаши од дискриминација во затворите. Како што пренесува Mitteldeutsche Zeitung, сега се поставуваат прашања за затворот во кој ќе бидат испратени обвинетите доколку пресудата стане правосилна.

Портпаролот на обвинителството во Хале рече дека „не постои автоматски механизам за префрлање на маж во женски затвор затоа што го сменил полот и името“ и дека ова прашање ќе треба да се разгледа поединечно. Но, тој појасни дека административната евиденција е од второстепено значење, бидејќи физичкото лице кое ги сторило делата останува исто и во секој случај мора да ја одлежи казната.