Хан: Ветото на Макрон претставуваше навреда за Еврокомисијата

фото:ЕPA EFE/STEPHANIE LECOCQ

Еврокомесарот во заминување Јоханес Хан во интервју за Фајненшл Тајмс ја повтори разочараноста што на Северна Македонија и Албанија не им беше дозволено да почнат преговори за членство со Европската Унија.

Хан вели дека до блокада на преговорите дошло во момент кога требало да се зајакнат напорите за ЕУ да стане посилен светски играч и оти претставувало губење влијание во регионот, за кој вели дека е близок историски и географски на ЕУ, притоа оставајќи простор за Кина и Русија.

– Најболно е тоа што ЕУ не ги демонстрираше принципите на парнерство и одговорност, на кои секогаш се повикува и на кои секогаш се потпираме, потенцираше Хан.

Тој искажа фрустрираност од блокадата од францускиот претседател Емануел Макрон, напоменувајќи дека Париз ги спречил преговорите со Северна Македонија, дури и откако земјата постигна договор со Грција за „исклучително чувствителниот проблем со името”.

Тој оцени дека тоа претставува навреда за годините што Еврокомисијата ги поминала во поставување на политичка рамка за договор и испратил погрешна порака до регионалните лидери.

– Процесот на пристапување е заснован на заслуги и ако не го признаеме напредокот, нема да има стимул за реформи, рече тој.

Хан откри дека српскиот претседател Александар Вучиќ, по блокадата на преговорите за членство на Северна Македонија и Албанија, му рекол дека не му е јасно зошто би бил мотивиран да го продолжи дијалогот со Приштина. Весникот оцени дека таквиот став е удар за ЕУ, која минала 10 години обидувајќи се да биде ментор во разговорите меѓу Белград и Приштина.

И покрај драматичниот крај на неговиот мандат, Хан вели дека е горд на прогресот направен додека тој ја извршувал функцијата во смисла на подобрување на односите во регионот. Тој потсети дека од 2015 година ЕУ во регионот инвестирала речиси една милијарда евра преку фондови за меѓусебно поврзување, а трговијата во рамки на регионот се зголемила за 20 отсто. Хан, исто така, го пофали планот за укинување на таксите за роаминг за корисниците на мобилни телефони во регионот до 2021 година, врз основа на моделот на ЕУ. Еврокомесарот во заминување упати пофалби и за регионалната иницијатива за укинување на царинските бариери во трговијата.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот