Хан: Станувам фосил во ЕУ
Сега навистина станувам фосил во ЕУ, да бидеш номиниран по третпат е нешто невообичаено, досега имало само три вакви номинации, рече еврокомесарот Јоханес Хан на денешната прес-конференција одговарајќи на честитката на премиерот Зоран Заев за тоа што Австрија повторно го номинира за комесарска позиција.
– Номиниран сум едногласно во австрискиот парламент и тоа е признание за она што е постигнато досега, а дел од тоа е и она што е постигнато во Северна Македонија во последниве години. Со мојот тим тука поминавме многу денови и ноќи со цел да постигнеме напредок и да ја вратиме земјата на евроатланските перспективи – рече Хан.
Заев истакна дека за Хан без резерва може да каже дека е наш сопатник и поддржувач на патот за членство во ЕУ.
-Јавно сакам да му честитам за неговата номинација.Тој е значаен бидејќи даде голем придонес за да се случат позитивни промени во нашата земја. Очекуваме ова пријателство да продолжи во иднина. Без разлика кој сектор тој ќе го води и во иднина ќе остане наш линк – рече Заев