Халанд конечно проговори за провокациите од фудбалерите на ПСЖ
Норвежанецот конечно кажа што мисли за начинот на прославата на играчите на ПСЖ по елиминацијата на Борусија Дортмунд.
Во првиот натпревар од пресметката во Лигата на шампионите, Борусија славеше со 2:1 благодарение на Ерлинг Халанд кој двата гола ги прослави така што симулираше дека медитира, а победата тешко им падна на фудбалерите на францускиот тим иако постојано играа на работ на фер-плејот.
Во реваншот ПСЖ победи со 2:0 и обезбеди пласман во четвртфиналето, а бидејќи се играше пред празни трибини, се слушаше како играчите ги коментираат головите и во еден момент камерите го фатија Анхел ди Марија како им вели „Ајде на овие бедници да им дадеме пет гола“.
По завршување на натпреварот, фудбалерите на ПСЖ, на наговор на Нејмар, победата ја прославија така што седнаа на теренот и симулираа дека медитираат, со што покажаа дека не знаат што значи фер-плеј.
Сепак, чудото од дете не им се налути.
– Ми помогнаа со тоа што ме исмеваа. Сликите го обиколија светот, јас обожувам да медитирам и сметам дека тоа е добра работа за здравјето и духот на луѓето. Иако тоа не им беше вистинската намера, на крајот ја промовираа медитацијата – одговори Халанд.