Менаџерот на Манчестер сити, Пеп Гвардиола изјави дека можеби е дојдено време некој друг клуб да ја освои титулата во Премиер лигата, но додаде дека „граѓаните“ нема да се откажат од борбата за шампионскиот трофеј, пренесуваат британските медиуми.

Во саботата Манчестер сити беше поразен од Брајтон (1:2) во натпреварот од 11 коло во Премиер лигата. Клубот од Манчестер е поразен на последните четири мечеви во сите натпреварувања.

– Не одигравме добро и тоа е факт. Сепак, сето тоа е сосема нормално во фудбалот. Мора да се обидеме да се вратиме на победничките патеки – изјави Гвардиола.

Тој призна дека Манчестер сити има тежок распоред на натпревари.

– Сега ни претстои репрезентативна пауза, по која нѐ очекува серија уште потешки натпревари. Во последните седум години шест пати ја освоивме Премиер лигата. Не можеме да очекуваме ниту Манчестер да биде полн со шампиони во следните 50 години. Можеби е време некој друг да ја освои титулата. Ќе видиме. Ќе се бориме, имаме уште доволно време – вели Шпанецот.

Манчестер сити моментно е на второто место на табелата во Премиер лигата со 23 бодови, пет помалку од првопласираниот Ливерпул.