Гувернерката на Порторико, Ванда Васкез, прогласи вонредна состојба и ја активираше Националната гарда, пишува весникот „Нуево дија“, а пренесува „Б92“.

Вонредната состојба е прогласена откако низа на земјотреси го погодија карипскиот остров, вклучувајќи и еден со јачина од 6,4 степени по Рихтеровата скала.

Во земјотресите загина најмалку едно лице, прекинато е снабдувањето со струја на поголемиот дел од островот и нанесена е голема материјална штета, известија властите и медиумите, а пренесе „Ројтерс“.

Според локалните медиуми, загинало едно 73-годишно лице кога врз него се срушил ѕид.

Васкез рече дека сите компании во јавниот сектор, освен оние кои работат со итни услуги, денес ќе бидат затворени и дека итните планови се спроведуваат.

Порторико беше погоден од серија на земјотреси во последните денови, а во земјотресот со јачина од 5,8 степени по Рихтер кој го погоди островот вчера, немаше жртви, но беа оштетени повеќе куќи на јужниот брег.

– Сакаме сите да бидат безбедни. Поради тоа денес запира работата во јавниот сектор, за да можете да бидете со семејствата и да ги спроведувате плановите за вонредни ситуации – напиша Васкез на Твитер.