Гутереш во изолација по изложувањето на ковид-19

Антонио Гутереш, генералниот секретар на Обединетите нации / Фото: EPA-EFE/MAXIM SHEMETOV

Генералниот секретар на ОН Антонио Гутереш бил изложен на коронавирус од официјален претставник на ОН кој бил заразен и ќе биде изолиран во текот на следните неколку дена, соопштија дипломатски извори.

Гутереш (72) ги откажа своите претстојни ангажмани, рекоа извори за АФП, пренесува БГНЕС.

Шефот на ОН денеска требаше да биде почесен гостин на Асоцијацијата на медиумите на ОН на нејзината годишна гала вечер на Менхетен. Во четврток тој требаше да присуствува на состанокот на Советот за безбедност на ОН за предизвиците што ги носи тероризмот и климатските промени, со кој претседава нигерискиот претседател Мохамед Базум.

Портпаролот на генералниот секретар Стефан Дужарик одби да ја коментира состојбата на Гутереш.

Пред неколку дена, Дужарик објави дека Гутереш неодамна ја примил својата трета вакцина против коронавирус откако долго се двоумел дали е соодветно да се прими бустер доза, додека милиони луѓе ширум светот сè уште не ја примиле својата прва доза.

Видео на денот