Густ снег и обилни дождови ја парализираа Австрија, евакуација на населението во повеќе региони
Поради обилен снег и дожд денес се затворени училиштата и повеќе патишта во одредени делови на Австрија. Пожарникарите успеаја да спасат две жени чии домови се уништени во одрони во близина на Салцбург, за потоа тие да бидат хоспитализирани.
Повеќе од 30 луѓе се евакуирани од своите домови во покраината Штаерска поради стравувања за лизгање на земјиштето, а жители на петнаесет згради во Корушка се евакуирани поради можност за излевање на реката Гурк.
Утринава две илјади домови во источен Тирол останаа без струја, пренесе „Дојче веле“.
На италијанската страна, во јужен Тирол владее хаос, а Венеција и понатаму е под вода по големите поплави.
Снегот во Австрија започна да паѓа минатата недела, но неговиот интензитет се засили за време на викендот. Во Франција снежната бура веќе однесе еден живот, а во Велика Британија исто така се забележани поголеми поплави.