Гурманска пица со сланина, печурки и моцарела
Потеклото на пицата е доста контроверзна тема. Имено, многу градови како Неапол и Џенова сметаат дека се „татковците“ на пицата. Всушност, со оглед на тоа дека се работи за еден вид на леб, таа е присутна во многу различни варијанти насекаде низ светот и во зависност од нејзините состојки како и од локалните гастрономски традиции, нејзиното потекло не е сосем историски потврдено.
Доколку сте љубители на овој гастрономски специјалитет имаме нов рецепт за вас – Гурманска пица со сланина, печурки и моцарела.
Состојки:
За тестото:
– 1 свеж квасец
– 1 лажица шеќер
– 70 мл вода
– 225 г брашно
– 4 лажици маслиново масло
– сол
За филот:
– 80 г доматен сос
– 60 г моцарела
– 5 резанки сланина
– 40 г сечкани свежи печурки
– 40 г пармезан
– 1 јајце
Подготовка:
Откако квасецот ќе стаса, во сад измешајте го со останатите состојки и замесете тесто. Добро размесете го и обликувајте го во топка, па ставете го во сад покриено со крпа да стасува 40 минутидодека се удвои. Потоа премесете го и нека одмори уште 15 минути. Готовото тесто расукајте го и ставете го во плех обложен со хартија за печење. Намачкајте го со доматен сос, ставете ги ренданите кашкавали и посипете со малку густа павлака за готвење, само малку.
Ставете парчиња сланина, сечкани печурки и зачинете со сол и црн пипер. Печете во рерна загреана на 200 степени. Извадете ја од рерна пицата, одделете ја белката од жолчката и ставете ја белката, па нека се потпече. Потоа извадете ја од рерна пицата, на средина ставете ја жолчката и повторно потпечете две минути. Посипете со оригано и послужете.