Ѓуриќ: Курти од ден во ден потврдува колкава опасност претставува за стабилноста на регионот и Европа
Кандидатот за премиер на Косово, Албин Курти, од ден во ден потврдува колкава опасност претставува за стабилноста на регионот и европа воопшто, посочи директорот на Канцеларијата за Косово и Метохија на српската влада, Марко Ѓуриќ.
Според Ѓуриќ, главна цел на Курти е „нанесување штета на Србија и српските национални интереси“.
– Тој по диктаторските рецепти од 30-тите години на минатиот век го обесмислува принципот на мирно решавање на кризата и дијалогот, порачувајќи дека не сака разговори со Белград, туку дијалог за дијалогот, што е еуфемизам за целосно исклучување на дијалогот – оцени Ѓуриќ.
Тој смета и дека „се потсмева“ со меѓународната заедница и нејзините обиди да помогне во создавање зона на стабилност и безбедност на западниот Балкан, што „засега му успева и проаѓа без какви било санкции“.
– Негова јасна намера е во што поголема мера со своите фашистички пораки и потези да ги радикализира и милитаризира Албанците за во иднина својот големоалбански проект да го наметне под закана на сила – тврди Ѓуриќ.
Тој истакна дека Србија „никогаш нема да потклекне пред заканите на непријателите на демократијата и мирот“ и дека ќе вложи политички, дипломатски и „секакви други средства кои ѝ се на располагање“ за да „го скроти пироманот Курти и неговите најекстремни поддржувачи“.