На располагање на Територијалната противпожарна единица Тетово од вчера ѝ е нова опрема, донација од граѓанин-иселеник од гостиварско во Швајцарија. Станува збор за скали со елеватор, кои ќе може да се користат при гасење пожари на висококатници, објави порталот „Тетовоинфо“.

Донаторот е Блерим Селмани од гостиварското село Ѓурѓевиште, кој живее и работи во Швајцарија.

-Во просториите на Територијалната противпожарна единица Тетово денеска примивме уште една нова донација , која значително ќе ги подобри условите на ТППЕ. Се заблагодарив на донаторот, Блерим Селмани и на командантот Ука Алити, кои со покажаната конструктивност, за потребите на ТППЕ Тетово , обезбедија донација од два пара скали со ескалатор со висина од 21 метар, кои ќе се употребаат во гаснење пожари во повеќекатниците. Ова значително ќе го олесни пристапот, но и ќе ја зголеми успешноста и брзината во акциите кога се гаси пожар во високи згради, вели тетовскиот градоначалник Биљал Касами.

Денеска, ден по донацијата со скалите, во тетовската противпожарна единица дојдоа и претставници на Унијата на млади сили (УМС) на ВМРО-ДПМНЕ од градот, а на Фејсбук објавија дека донирале телевизор и им доделиле благодарница на пожарникарите.

„Со еден скромен подарок од наша страна, сакаме да им се заблагодариме на овие модерни херои на град Тетово“, напишаа младите од ВМРО-ДПМНЕ.

Тетовските пожарникари со децении работат во тешки услови и изведуваат тешки и опасни интервенции без соодветна опрема. Тие во изминатиов период особено се истакнаа во напорите за гасење на големиот пожар во фабриката „Пофикс“, како и во справувањето со поплавите кои го зафатија градот пред неколку недели.