Нобеловиот комитет да ја повлече одлуката да му се додели Нобелова награда за литература на Петер Хандке, бара таканаречената група „Мајките на Сребреница“, која ги обединува роднините на жртвите на „најголемиот масакр во Европа по Втората светска војна“.

Австрискиот автор важи за контроверзна личност во одредени земји поради неговата поддршка на српскиот национализам и на Слободан Милошевиќ за време на војните кои ја растурија Југославија.

„Оваа одлука нѐ навреди и нѐ боли. Мајките на Сребреница ги изгубија своите синови, сопружници и браќа и Нобеловиот комитет требаше да знае кој е тој човек“, изјави Мунира Субашиќ од „Мајките на Сребреница“.

„Вечерва ќе се напијам чашка српска ракија и чаша бело вино“, изјави Хандке за српската државна телевизија.

Косово, Албанија и ПЕН Америка исто така ја критикуваа одлуката на Нобеловиот комитет.