Групата „Фолтин“ тргнува на домашна турнеја со концерти во Струга, Прилеп и Велес
Јубилејот 25 години од првиот концерт е повод популарната битолска група „Фолтин“ да тргне на мини-домашна концертна турнеја. Во рамките на турнејата најавени се концерти во Струга (Летна сцена на НУЦК) на 25 јули, Прилеп (Летна сцена на НУЦК) на 29 јули и во Велес (Амфитеатар) на 31 јули.
Концертите се финансиски поддржани од Министерство за култура и се во соработка со Центрите за култура во Струга и Прилеп, како и со Општина Велес.
Групата „Фолтин“ се наоѓа во фаза на најзрела уметничка дејност. Неодамна во Скопје го промовираше своето најново студиско издание „Симултан бакнеж“. Станува збор за албум со четири песни снимени во Студио „Алшар“ – Скопје, во декември 2020 година.
На најавените концерти ќе ги промовираат најновите песни, но ќе ги свират и своите најубави стари песни. Почетокот на трите концерти е во 21 часот, а влезот ќе биде бесплатен.
(Текстот е објавен во „Културен печат“ број 90, во печатеното издание на „Слободен печат“ на 24-25 јули 2021)