Првиот вицепремиер и министер за политички систем и односи меѓу заедниците, Артан Груби заедно со директорот на „Македонија пат”, Беким Мемети, директорот на „Државни патишта”, Ејуп Рустеми и директорот на Агенцијата за спроведување на јазикот, Илбер Села денеска направи увид во замената на старите еднојазични патокази со нови кои се напишани на албански, на македонски и на англиски јазик.

По тој повод, вицепремиерот рече дека јазичната еднаквост ќе се рефлектира долж Коридорот 8.

– На последната седница на Владата ја усвоивме одлуката и годишната програма за работата на ЈП „Државни патишта”. Коридорот 8 е решен во форма на автопат во целост, вклучувајќи и трета лента на автопатот Тетово – Гостивар, изградба на автопат од Гостивар до Кичево, автопат Кичево – Охрид и Охрид – Струга – Ќафасан, односно нашите граѓани од Ќафасан до Блаце со Република Косово или до другите граници ќе се возат по модерен автопат, изјави Груби.

Според Груби, модернизацијата на Коридорот 8 и неговата реконструкција е од особено значење заради регионалното поврзување и соработката и од економско значење е за земјава.

Во изјавата, Груби истакна и дека со оваа одлука на Владата продолжуваат инвестициите во насока на подобрување на квалитетот на патната мрежа и зголемување на безбедноста во согласност со правилата на Европската Унија.