Вечерва на Алсат гостуваше потпретседателот на ДУИ, Изет Меџити, кој е дел од таканаречената „огнена група“ на незадоволни функционери на ДУИ, кои бараат да биде разрешен Артан Груби и другите владини министри кои доаѓаат од ДУИ.

На прашањето за Груби, Меџити рече дека „тој е многу оптоварен: како партиски секретар, вицепремиер и слично“, затоа, според него, стои и нивната забелешка.

„Кој и да е, не само Артан Груби, туку никој не може да биде и организациски секретар и вицепремиер, компетентен за проекти, за концерти, за медиуми, тоа е апсурдно, рече Меџити.

Во однос на интерпелацијата како метод да се разреши Груби, тој рече дека тоа е демократски метод, но во принцип треба да го иницира опозицијата.

Меџити додаде дека доколку дојде до интерпелација, „тогаш ќе се види дали тој блефира, или ќе гласа за разрешување на кој било министер“.