Пред неколку дена во полицијата во Берово било пријавено дека на местото познато како „Црвени брегови“ во атарот на градот, бил забележан извршител на погребални услуги, лиценциран од Општината, како фрла посмртни останки извадени од Градските гробишта во градежна депонија.

Веднаш по добиената пријава, во консултација со јавен обвинител и во содејство со ракувач со работна машина багер од јавното претпријатие за комунални работи во Берово,  било извршено пребарување на посоченото место и на пошироката околина, но не биле пронајдени предмети кои потекнуваат од кривично дело, туку биле пронајдени само остатоци од градежен шут и остатоци од отпад – велат од СВР Штип.

Оттаму додаваат дека по дополнителни разговори со беровската полиција осознале дека осомничениот во повеќе наврати вршел ископување на старите гробови и ги фрлал остатоците од починатите лица на друга локација.

По овластување на јавен обвинител бил направен увид на гробиштата во селото Смојмирово, каде на една локација биле пронајдени пет коски налик на коски од човек.

Од полицијата информираат дека по целосно расчистување на случајот, против осомничениот ќе биде поднесена соодветна пријава.