Поранешниот играч и капитен на фудбалскиот клуб Вардар се огласи на Фејсбук по повод случувањата поврзани со клубот кој бара спас од финансиската криза.

Бобан Грнчаров вели дека Градот Скопје не е должен да му помогне на клубот, бидејќи тоа бил долг на сегашниот сопственик, Сергеј Самсоненко.

Шилегов му порача на Неловски: Вардар може да биде вратен на градот само без долгови, најдете два милиони евра за да го спасиме клубот (ВИДЕО)

Поради сегашната ситуација, ,,виси” судбината на клубот и настапот во квалификациите и ова лето, пишува „Вардар фанс“.

– Многу ми е смешно кога гледам коментари град Скопје да помогне на ФК Вардар. Како прво, како Вардар бара помош од Град Скопје кога должи над 2 милиони евра. Зошто кога земаа пари од Европа над пет милиони не кажаа ај ќе поделиме со Град Скопје, за утре задутре доколку ни требаат ќе ни помогнат тие. Вардар е приватен клуб и кога зема пари и кога ќе треба да се дадат пари. За ова што се случува моментално е виновен еден човек и тој треба тоа да го реши сам (се надеваме дека денес ќе го реши и Вардар ќе добие лиценца), а второ парите што ги земаа од Лига Европа се во РК Вардар, така што сега нека бараат помош таму – напиша Грнчаров на Фејсбук.