Гренел: Авиолинијата Белград – Приштина ќе им помогне на бизнис заедницата и граѓаните
Според него, сега граѓаните и бизнисмените ќе можат шестчасовното возење да го заменат со 20-минутен лет.
Договорот меѓу Белград и Приштина за обновување на авиоврската меѓу двата града ќе му помогне на бизнисот да отвори нови работни места и да го прошири пазарот, изјави за Блиц специјалниот претставник на американската администрација за дијалогот меѓу Србија и Косово, Ричард Гренел.
Вели дека економскиот развој е клучот за покренување на целиот процес.
-Кога претседателот Трамп побара да бидам специјален претставник јасно ми рече дека економскиот развој е клучот за покренување на целиот процес. Економскиот раст е и секогаш ќе биде најголем создавач на богатство за луѓето од овој регион. Историското потпишување за воспоставување директни летови меѓу Белград и Приштина, прв после 21 година, ќе и помогне на бизнис заедницата да отвори нови работни места и да го прошири пазаров, вели Гренел.
Според него, сега граѓаните и бизнисмените ќе можат шестчасовното возење да го заменат со 20-минутен лет.
-Сакам да се заблагодарам на двете страни што го направија овој историски чекор, како и на „Луфтханса“ и НАТО. Претседателот Трамп и неговиот тим напорно работеа за да го постигнат овој договор, што е само почеток на светлата иднина која ја предвидуваме за нашите пријатели во Србија и на Косово, напиша Гренел на социјалната мрежа Твитер.
Вчера во Берлин беше потпишан овој историски договор со компанијата „Луфтханса“.