За годинава, барем официјално, не е закажана ниту една свадба, а резервациите кои стојат од лани, веќе почнаа да се префрлаат за 2022 година. Прецизно, ваквите објекти, не работат уште од ноември 2019 година, кога заврши свадбарската сезона за таа година, а од март 2020, кога требаше да почне новата, рестораните се под клуч.

-Не работиме повеќе од една година, се што беше закажано се откажа, а веќе почнуваат да се презакажуваат и оние кои имаа термини за оваа година. Нашите простории се огромни и може да се почитуваат здравствените протоколи, а ако ни наложат, би прифатиле дури и да бараме сите гости да бидат вакцинирани – велат за „Слободен печат“ од ресторанот „Амор“.

Од Владата информираа дека до почетокот на декември лани, до Министерството за економија преку платформата www.domasiedoma.gov.mk , пристигнале вкупно 238 апликации за грантови за ресторани за свадби, од кои 133 ги исполниле условите од јавниот повик, а биле искористени средства во износ од 55,7 милиони денари.

-Помошта ни оддалеку не беше доволна за да се спаси нашето работење. Јас лично не земав, бидејќи сакаме да работиме, а не да земаме помош. Најголемиот дел од нас, имаат земено кредити, за кои треба да се платат рати и камати, течат даноци и плати. До лани во ноември имав 17 вработени, а располагаме со простор од 11.000 квадрати, кој бара одржување. Со колегите размислуваме да ги оставиме клучевите од објектите пред Владата, бидејќи ионака сме пред банкрот- велат од ресторанот „Грин Гарден“ во Сопиште.

Во моментот, судбоносното „да“, може да се изрече во Управата за матични работи, каде според сите протоколи, освен младенците може да присуствуваат и двајца сведоци. И по повеќе од една година, се уште нема други насоки, според кои на свечениот чин ќе може да присуствуваат повеќе лица. Епидемиолозите, сметаат дека дури и да се вакцинираат сите, групирањето особено на свадби ќе треба да се избегнува.

За незаконско организирање веселба со повеќе лица следува казна од 2.500 евра, едномесечно затворање на објектот и кривична пријава. Сепак, инспекторите и полицијата секојдневно растураат барем по неколку свадби.