Македонскиот сениорски репрезентативец Горан Пандев (37) го постигна победничкиот гол минатиот месец во Тбилиси против Грузија (0:1) за историски пласман на нашата А селекција на наредното Европско првенство.

„Црвено-жолтите“ предводени од селекторот Игор Ангеловски после овој триумф беа сместени во групата „Ц“ со Холандија, Украина и Австрија, а дуелите ќе ги играат во Букурешт и Амстердам.

„Гранде“ Пандев, играчот на Џенова, кариерата во која забележа огромни успеси на клупски план ќе ја збогати и со учество на континентален собир.

Во интервјуто за „mozzartsport.com“ зборуваше за импресиите од големиот резултат, очекувањата на Евро 2020, за неговиот клуб Џенова, спортски настан кој му остана во убаво сеќавање..

– Нашата репрезентација заврши одлична работа. Добро е за Македонија, за нашата репрезентација. Прв пласман на нашата А селекција на големо натпреварување е круна на мојата кариера. Се надевам дека пандемијата ќе заврши и ќе имаме голема поддршка од нашите навивачи. Реално ние сме аутсајдери, но немаме што да загубиме. Првите два натпревари против Австрија и Украина ни се најважни – рече Пандев.

Воедно ги одвои и спортските настани кои најмногу му останаа во убаво сеќавање..

– Два натпревари, последниот со Македонија против Грузија на 12 ноември и нашиот голем успех. Вториот е финалето во Лигата на шампионите помеѓу Баерн и Интер (во 2010 година на „Сантјаго Бернабеу“, Мадрид), во кое триумфиравме со 2:0 – додаде нашиот напаѓач кој во Италија ги бранеше и боите на Лацио и Наполи.