Граѓаните се мобилизираат, вечерва во 19 часот нов протест пред Владата
Вечерва со почеток од 19:00 часот нов протест пред Владата на Република Македонија најавија од „Ултиматум – НЕ благодарам”.
Тие ги повикаа граѓаните уште помасовно и погласно да го искажат својот револт против францускиот предлог со кој се прифаќаат сите бугарските услови.
Вчера во истиот термин пред Владата се одржа голем протест под мотото „Ултиматум – Не, благодарам” против прифаќањето на овој предлог предводен од страна на опозициската ВМРО-ДПМНЕ, којшто беше поддржан и од други политички партии, граѓански организации и јавни личности кои сметаат дека предлогот од Франција е исклучително лош за македонскиот народ и македонските национални интереси.
На протестот беа кажани пораки против францускиот предлог, се апелираше тој да не се потпишува, а беа упатени и барања за оставки.
Беше повикана Владата да не го потпишува предлогот со порака „Македонија е се што имаме и од неа никогаш и под никакви услови нема да се откажеме”.
Помал протест на група граѓани се одржа и во петокот откако Владата на својата официјална страница го објави францускиот предлог.