„Граѓаните“ крадат две желби на Јунајтед
Манчестер сити се наоѓа на два натпревари до триумф во Премиер лигата, но „граѓаните“ сезонава ќе ја паметат по болната елиминација од Тотенхем во Лигата на шампионите.
Тие веќе трета година под водство на Пеп Гвардиола не успеаваат да обезбедат пласман во полуфиналето на ЛШ, и поради тоа на лето планираат да ја засилат екипата како конечно би ја исполниле целта.
Главен приоритет на Гвардиола во летниот преоден рок ќе му биде ангажирање играчи во средниот ред и на списокот се наоѓаат само три имиња за кои се подготвени повеќе од 200 милиони евра.
Жоао Феликс од Бенфика кого го бара половина Европа, а меѓу нив е и градскиот ривал, Манчестер јунајтед, е достапен за 120 милиони евра. Толку изнесува клаузулата и Бенфика нема намера да преговара за намалување на сумата. Според португалскиот весник „Рекорд“, директорот на Манчестер сити, Чики Бегиристајн веќе имал средба со родителите на младиот фудбалер на Бенфика, Карлос Секуеро и Карла Феликс, на која ги уверувал дека Жоао би напредувал под тренерската палка на Гвардиола.
Второто име на списокот на Гвардиола, е исто така голема желба на Манчестер јунајтед, Бруно Фернандеш од Спортинг Лисабон. Тој би требало да дојде како замена за Илкај Гундоган кој на лето си оди од Сити. И тука „граѓаните“ ќе мора да ја платат откупната клаузула која изнесува 35 милиони евра.
Третата желба е фудбалерот на Атлетико Мадрид, Родри. Атлетико за еден од најдобрите фудбалери сезонава бара 70 милиони евра.