„Граѓаните“ го известија Наполи дека се откажаа од Кулибали
Со купувањето на Диаш од Бенфика, Манчестер сити го затвори преодниот рок.
Англискиот вицешампион и официјално се откажа од купување на Калиду Кулибали, „граѓаните“ денеска го известија Наполи дека повеќе не се заинтересирани за трансфер бидејќи веќе ангажираа друг дефанзивец.
Овој потег на Манчестер сити дополнително ќе ја зголеми напнатоста на релација Наполи и Фали Рамадани кој е агент на Кулибали.
Рамадани по завршување на минатата сезона му вети на Наполи дека ќе обезбеди вистинска понуда од Манчестер сити, понуда која ќе ги задоволи и двете страни. Преговорите помеѓу англискиот и италијанскиот тим траеја цело лето, медиумите известуаа дека Наполи бараше помеѓу 70 и 80 милиони евра, додека Манчестер сити беше подготвен да издвои највеќе 60 милиони.
Откако пропаднаа преговорите, поголем дел од медиумите во Италија објавија дека Манчестер сити воопшто не доставил официјална понуда за Кулибали, а како главен виновник го посочија токму Рамадани.
Пеп Гвардиола конечно си најде дефанзивец, Диаш за 55 милиони евра се сели во Сити
Манчестер сити по убедливиот пораз од Лестер во Премиер лигата, експресно реагираше и вчера за 55 милиони евра го договори Рубен Диаш од Бенфика која освен парите го доби и искусниот Николас Отаменди.