Стрип-книжарницата „Бункер“ го објави графичкиот роман „Уметноста на летањето“ на Антонио Алтариба и Ким. Оттаму велат дека изборот на романот не е случаен, бидејќи станува збор за вистинско ремек-дело, чие прво издание во 2009 година било означено како пресвртница во историјата на графичкиот роман во Шпанија и ја освоило најпрестижната шпанска награда „Premio Nacional del Comic“ под покровителство на Министерството за култура на Шпанија.

Ова извонредно дело е споредувано со „Маус“ од Арт Спигелман, првиот графички роман освојувач на Пулицеровата награда во 1992 година. Следувале преводите на голем број јазици: англиски, француски, германски, италијански, португалски, турски, корејски, каталонски, како и дузина престижни награди. Познатиот англиски стрип-теоретичар, Пол Гравет, го вброил ова дело во неговата антологија „1001 стрип кои треба да ги прочитате пред да умрете“. Изданието на „Бункер“ е прва објава на ова дело во регионот.

Во „Уметноста на летањето“, Алтариба преку бруталниот опис на страдањата на татко му (малиот човек), со хируршка прецизност ги сецира настаните во Шпанија и Европа во бурниот 20 век. Делото допира повеќе теми, како сиромаштија и беда, револуција, пораз, егзил, Втората светска војна, логори, поствоено време, повторно беда, корупција и резигнираност. Од сите страдања произлегува пораката на хуманост до денешните генерации, бидејќи во секојдневното жестоко наметнато темпо често забораваме на основните мали гестови на човечност.

(Текстот е објавен во „Културен печат“ број 60, во печатеното издание на „Слободен печат“ на 12-13 декември 2020)