Графички предизвик: „Уметност и уметник“ со делата на Соња Димовска
Предизвиците што уметници од различни области си ги задаваат преку социјалните медиуми се убава можност да се спознае нивното творештво. Покрај музичките, фотографските, книжевните, има и графички предизвици. Таков е „Уметност и уметник“, на кој графичарката Соња Димовска одговори со десет свои дела предизвикана од својата колешка Ивана Видиќ од Србија.
– Во овој период на социјална хибернација еден од начините за одржување на контакт со реалноста ми се и контактите преку социјалните мрежи со колегите буквално од цел свет. Овој предизвик го прифатив откако ме номинираше графичарка од Србија и го доживувам како еден вид солидарност да се поддржиме едни со други и да ја промовираме својата уметност во време кога галериите се затворени.
Воедно, да споделуваме активности, позитивност, страст и внимание на уметноста и уметниците, но и да го свртиме вниманието кон убавите нешта за полесно да го поднесеме овој тежок период на изолација – објасни Соња Димовска, која е автор, но и професор по графика и графички техники.
(Текстот и фотографиите се објавени во „Културен печат“ број 34, во печатеното и електронското издание на „Слободен печат“ на 5-7 јуни 2020)