Во Венеција последните неколку дена е под вода, како резултат на силно невреме проследено со дождови и силен ветар, поради што нивото на водата моментално е на 160 сантиметри.

Поради целото ова сообраќајот во градот е во прекин, училиштата, продавниците и канцелариите се затворени, а досега загинале и четири лица.

Како што јави денес ТГ24, градоначалникот на Венеција, Луиџи Бруњаро, изјавил дека штетата предизвикана од високиот водостој во последните неколку дена е поголема од милијарда евра.

Бруњаро денеска повика да се размисли за формирање на меѓународна агенција за води во Венеција.

– Така, научниците од целиот свет кои сакаат да дадат придонес ќе можат да го сторат тоа. Венеција е прв показател на она што ќе се случи во целиот свет поради климатските промени. Затоа, ако Венеција победи, сите ние ќе победиме – вели Бруњаро.