Град Скопје преку јавен повик ќе избира приватни автобуски превозници
Град Скопје ќе распише јавен повик на кој ќе можат да се пријават сите заинтересирани автобуски превозници во Скопје кои и до сега превезувале патници, но овој пат на повикот ќе имаат можност да учествуваат како поединци а не како што беше случај до сега во рамките на двете здруженија „Макекспрес“ и „Слобода превоз“.
Ова го најави градоначалничката на Град Скопје Данела Арсовска, која меѓу другото, во целост ја отфрли информацијата која вчера проструи во јавноста дека скопјани наскоро ќе ги возат автобуси сопственост на приватна фирма од соседството.
– Во Град Скопје освен што ќе возат автобусите на ЈСП, исто така Град Скопје изготви и нов јавен повик каде што на секој од досегашните поединечни превозници ќе му биде понудено директно и индивидуално да си аплицира, да си добие линија, со исполнување на условите кои ќе бидат објавени во јавниот повик и се со цел да може да се обезбеди соодветен јавен превоз – информираше Арсовска.