Ѓоргиев: Противникот не е спортски, заедно можеме повеќе и подобро! (ВИДЕО)
Еден од нашите најдобри одбојкари апелира во борбата против коронавирусот да бидеме сложни, одговорни и да ги следиме препораките на институциите.
Многу спортски натпреварувања се одложени поради епидемијата на коронавирусот, а помеѓу нив се и одбојкарските.
Еден од најдобрите македонски одбојкарски репрезентативци, Никола Ѓоргиев е исто така свесен поради опасноста со која се соочуваат луѓето во светот, па така со маска на лицето имаше порака до сите:
– Здраво на сите, јас сум капитенот Никола Ѓоргиев, ве поздравувам во името на македонската одбојкарска репрезентација. Во овие тешки услови во светот, сакам да апелирам да бидеме сложни, одговорни и да ги следиме препораките на институциите. Само така брзо можеме да го поразиме коронавирусот и да го вратиме животот во нормален тек. Ние спортистите сме навикнати на карантини, но оние спортските, со цел за подобрување на нашите резултати. А овој е здравствен карантин и можеби побитен од сите други досега.
Противникот не е спортски, но убеден сум дека сите заедно ќе создадеме победнички дух и ќе ја надминеме оваа закана. Верувајте во тоа и наскоро се гледаме на одбојкарските терени, бидејќи нè очекуваат Златната европска лига и квалификациите за Европско првенство. Заедно можеме повеќе, заедно можеме подобро – се зборовите на нашиот одбојкар преку видеото кое беше објавено од страна на Одбојкарската федерација на Македонија на својата фејсбук страница.
Како што и најави Ѓоргиев, ќе играме и во Европската златна лига во група со Чешка, Турција и Португалија.
Нашиот репрезентативец во текот на минатата година ја водеше Македонија на своето прво Европско првенство. Во квалификациите за наредното ЕП 2021 ќе се соочиме со Турција, Данска и Босна и Херцеговина. На континенталниот собир ќе се ајдат првопласираните седум репрезентации од секоја група и петте најдобри втори.
Воедно во Европската лига со селекцијата успеа трипати да го освои сребрениот медал, а во текот на клупската кариера ги бранеше боите на ОК Раднички Крагуевац, Форли, Пили Пијанго, Париз Волеј, Тореј Ероус, ОНИКО Варшава, а од 2018 година и член на Осака.
