Лина Ѓорческа денеска во големото финале во Турција, на турнирот вреден 15.000 долари, после скоро два и пол часа игра ја совлада третата носителка Оона Орпана од Финска со резултат 2:1 по сетови 6:4, 6:7 (5) и 6:1.

Нашата натпреварувачка беше прва носителка во Анталија и во сингл конкуренцијата ја оправда фаворитската улога.

На патот до финалето во првото коло ја елиминираше Сафо Сакелариди (Грција) со 6:1 и 6:2, во второто коло ја совлада Џени Дуерст од Швајцарија со 6:2 и 6:0.

Потоа во четвртфиналето со 3:6, 6:2 и 6:1 беше подобра од Русинката Екатерина Рејнголд, а во полуфиналната пресметка со 6:2 и 6:3 беше поуспешна од Украинката и седма носителка, Мариана Закарлјук.

И претходно Македонката ја освои Анталија, поточно во изминатата недела како втора носителка на тврда подлога кога оствари победа над Ирина Хромачева од Русија, што беше нејзина 10. титула во поединечна конкуренција, прва годинава, а има уште пет трофеи во дубл.

Се очекува нов напредок на нашата тенисерка на ВТА ранг листата, моментно во сингл е на 435. место