ГОЛЕМ ГРАБЕЖ НА АЕРОДРОМ ВО БРАЗИЛ: Се облекле како полицајци и украле 700 килограми злато
На аеродромот во Сао Паоло во Бразил група на крадци облечени во полициски униформи украле повеќе од 700 килограми злато, во вредност од околу 40 милиони долари, пренесува Глобал Њуз.
Осум маскирани крадци вчера влегле во товарниот терминал со два полициски автомобила, се наведува во извештај објавен од тамошната полиција.
Потоа, вооружените разбојници ги принудиле вработените на аеродромот да ги наполнат камионите со злато, со помош на виљушкар.
Во текот на разбојничката акција, која траела околу две и пол минути, немало пукање, а била регистрирана и од страна на надзорните камери.
Пред грабежот крадците киднапирале 8 члена на семејствата на вработени на високи позиции во аеродромот со цел да добијат информации за пратките со злато.
Иако точната украдена количина не е прецизирана, се споменуваат вредности од 720 до 750 килограми.
За време на бегството, криминалците неколкупати ги промениле превозните средства, а златото во еден момент било и во медицинско комбе за брза помош. Двете полициски возила подоцна биле пронајдени во магацин, од аеродромот оддалечен неколку километри.