Ѓоковиќ со најмногу грен слемови – поради подлогата и годините!
Поранешниот најдобар тенисер на светот, Хуан Карлос Фереро, вели дека Ѓоковиќ, Надал и Федерер ќе освојуваат титули и во наредните години.
Моментно Рожер Федерер има најмногу Грен слем титули со 20, Рафаел Надал е на 19, а после триумфот во Мелбурн, Новак Ѓоковиќ е на 17.
– Мислам дека Надал и Ѓоковиќ имаат можност да го престигнат Федерер. Сепак, поради неговите години и поради подлогата на кои се одржуваат Грен слем турнирите, мислам дека Новак ќе заврши со најмногу – рече Фереро, освојувачот на „Ролан Гарос“ во 2003 година, и додаде:
– Верувам дека младите играчи ќе бидат сè подобри и дека ќе бидат во состојба да играат на ниво како „Големата тројка“, но ќе има добри вести за Федерер, Надал и Ѓоковиќ уште неколку години.
На прашањето кој од младите играчи прв би можел да освои Грен слем трофеј, Шпанецот одговори:
– Тешко е да се каже, во 2019 година Тим и Циципас победуваа играчи од „Големата тројка“ на слемовите, така што тие се најблиску. Нивото на играта на Доминик во Мелбурн беше неверојатно, беше многу блиску. Покрај Новак, тој е единствениот кој може да го совлада Надал на „Ролан Гарос“.
Во текот на својата кариера Фереро освои 16 титули, а од турнирите заработи скоро 14 милиони долари.