Новак Ѓоковиќ со победата над Алсан Карацев во три сета, ја оправда улогата на фаворит и си обезбеди пласман во деветтото финале на Австралија Опен каде ќе се бори исто така за деветтиот трофеј.

– Нормално дека самодовербата ми е голема и поради тој податок. Никогаш не сум загубил во полуфинале или финале тука и тоа ме прави послободен на теренот. Секоја година е поинаку и ментално влијае на мене и моите противници, но се чини дека кај мене има позитивен ефект – изјави Ѓоковиќ, кој не сакаше да зборува за повредата.
– Не, не сакам да зборувам за тоа. На таа тема ќе зборуваме на крајот од турнирот.

Очекувано, бранителот на трофејот беше запрашан и за второто полуфинале во кое ќе играат Данил Медведев и Стефанос Циципас.
– Кој и да ми биде противник, јас ќе бидам подготвен за најтешкиот дуел на турнирот. И двајцата се наоѓаат во фантастична форма. Медведев има 20 победи по ред и игра феноменално, додека Циципас одигра неверојатно против Надал, губеше со 0:2 во сетови и успеа да победи. Знам дека тие двајца не се сакаат премногу и имаа несогласувања на теренот и затоа мислам дека ќе биде интересно. Тоа е прекрасно ривалство, ќе го гледам тој дуел со пуканки и ќе уживам – одговори Ѓоковиќ.