На интернет сајтот „дејлирепортс“ чија цел е промовирање на дигиталната валута биткоин, се појави измислено интервју со Новак Ѓоковиќ во кое освојувачот на 17. грен слем титули ги повикува луѓето, пред се во Србија да вложуваат во биткоин за да се збогатат преку ноќ.

Измамниците кои го направиле лажното интервју во текстот напишале дека Ѓоковиќ гостувал во емисија на српската телевизија Пинк и на која наводно рекол дека биткоинот му е главниот начин за заработување на пари.

– Мојот главен начин за заработка е новата програма на автоматско тргување со криптовалутите наречена „Биткоин ера“. Тоа е најдобра можност за добра заработка во кратко време. Ги повикувам сите да пробаат пред банките да го угасат овој систем – гласи измислената изјава на Новак Ѓоковиќ.

Но измамата тука не запира и Ѓоковиќ наводно покажал на својот телефон за колку го зголемил своето богатство.

– Можеби сте скептични бидејќи звучи премногу добро за да биде вистинито. Мило ми е што пробав бидејќи тоа беше најголема и најлесна заработка до која некогаш сум дошол. Зборувам за дневна пасивна заработка која изнесува десетици илјади динари. Тоа е најбрз начин моментно да заработите, но тоа нема долго да трае бидјеќи се повеќе луѓе ќе го откриваат и банките ќе го угасат засекогаш – наводно рекол Ѓоковиќ.

Според сајтот „дејлирепортс“ Народната банка на Србија побарала емитувањето на интервјуто да се прекине но било предоцна. На споменатиот сајт има уште неколку приказни од анонимни луѓе кои заработиле сериозни суми на пари.

Нормално ова е измислено интервју бидејќи досега во своите јавни настапи Новак Ѓоковиќ никогаш не ги споменувал биткоините, а тој е првиот тенисер кој ја проби бариерата од 100 милиони долари заработени од награди од тениските турнири.