Ѓоковиќ и Надал имаат прогноза за враќање на терените
Моментно двете најдобри тениски имиња во машка конкуренција сметаат дека нема наскоро да се враќаат на терените.
Новак Ѓоковиќ и Рафаел Надал велат дека очекуваат подолга пауза во натпреварувањата поради пандемијата на коронавирусот.
Моментно двете најдобри тениски имиња во машка конкуренција сметаат дека нема наскоро да се враќаат на терените.
Првиот светски рекет очекува подолга пауза пред да може да се игра тенисот без гледачи. Србинот смета дека играчите ќе треба да почекаат „неколку месеци“ пред да продолжат со турнирите.
– Тоа не е лесна одлука. Јас сум подготвен, но мислам дека ќе треба да почекаме неколку месеци – се зборовите на Ѓоковиќ за шпанското радио „Онда Церо“.
Поради пандемијата, „Ролан Гарос“ беше преместен за септември, започнувајќи веднаш по завршувањето на „УС Опен, а „Вимблдон“ е откажан, за прв пат по Втората светска војна.
– Доколку можеме да играме без публика, би било добро, но мислам дека ќе биде тешко – рече Надал во истата емисија.
– Тенисот е глобален спорт. Патуваме од држава во држава. Многу луѓе мора да бидат постојано во движење. Малку е веројатно дека некој голем турнир ќе се игра во краток или среден рок – додаде Шпанецот.
Фудбалските лиги се подготвуваат да продолжат без публика за да избегнат загуба на големи пари од телевизиските права.
Тениските турнири се потпираат повеќе на продажба на билети, што ја комплицира можноста натпреварите да се играат без публика.