Глигоров: Се враќам во клубот кој сезонава ја брка титулата!
Денеска Шкупи се пофали со нов играч во својот состав, Филип Глигоров кој веќе ги бранеше боите на оваа екипа во сезоната 2016/17.
Десниот бек претходно играше во шампионатите на Романија, Босна и Херцеговина, во нашата земја играше уште за Силекс. Претходно беше активен во албанската Супер лига за тимот на Влазнија запишувајќи 24 настапи и четири асистенции.
– Се враќам во Шкупи после четири години, зборував со челниците на клубот и ми се допадна проектот кој го прават, се формира добра екипа која ќе ја брка титулата. Ќе играме и во Лига Европа против Нефчи и желбата е да се пласираме во следната фаза. Ќе го дадам максимумот да се изборам за место во стартните 11, има голема конкуренција и се разбира борба за титулата – рече Глигоров.
Шкупи во првото коло од новата сезона во Првата лига како домаќин одигра нерешено 2:2 со Шкендија, а во следната рунда ќе се соочи со Македонија ЃП.
Претходно клубот од Чаир промовираше уште едно летно засилување, интернационалецот од Азербејџан, централниот дефанзивец Елвин Јунузада.
Во меѓувреме играчите на тренерот Муарем Бајрами го добија противникот во првото квалификациско коло на Лига Европа, тие на 27 август против Нефчи во Азербејџан.
ЛЕ: Ерменци за Ренова, Шкендија и Шкупи со ривали од Азербејџан!
