Главно жариште на ковид-19 во Европа: Мадрид е првата европска престолнина што повторно оди во карантин
Мадрид е првата европска престолнина што повторно се затвора. Лидерите на регионот денеска ја прифатија наредбата на централната власт за забрана на патувања што не се неопходни кон и од главниот град поради спречување на ширењето на коронавирусот.
Поради зголемен број на позитивни случаи, Мадрид и уште девет околни општини ќе одат во карантин, при што дозволено ќе биде патување само за работа, одење на училиште, посета на доктор или за купување на секојдневни намирници. За два часа ќе биде скратено и работењето на баровите и на кафулињата, па наместо во 01 часот по полноќ, тие ќе имаат обврска да затворат во 23 часот, пренесува „Ројтерс“.
Лидерот на мадридскиот регион, Изабел Диаз Ајсуо најави дека ќе поднесе жалба до судот за одлуката за карантин што наиде на револт и кај жителите на градот. Притоа рече оти немала избор, па затоа и засега се согласила на прифаќање на одлуката.
– Овој регион не негодува и строго ќе се придржуваме до сите наредби. Но, ќе одиме и по судови и ќе се залагаме за правата на мадриѓани“, рече Ајсуо.
Со 859 инфицирани лица на 100.000 жители, Мадрид во моментот е главно жариште на ковид-19 во Европа поради што и синоќешната одлука на шпанската влада за повторно воведување на карантин. Утре треба да бидат познати сите детали околу одлуката, меѓутоа и од кога ќе почне да се применува.