„Гласен текстилец”: Конфекциите во Штип да ги пуштат вработените на одмор
Во здравствениот билтен на Штип денеска се евидентираат 27 новозаболени од Ковид – 19.
Конфекциите во Штип времено да се затворат, а работниците да бидат пуштени на годишен одмор побараа денеска од невладината организација „Гласен текстилец“ откако и денеска градот забележа двоцифрен број на новозаразени лица со новиот корона вирус.
Поради ваквата состојба со заразата денеска заседава и Општинскиот кризен штаб, во проширен состав, во присуство на државниот секретар во Министерството за здравство, Владимир Милошев.
Во здравствениот билтен на Штип денеска се евидентираат 27 новозаболени од Ковид – 19.
Кристина Ампева од НВО „Гласен текстилец”соопшти дека нивното барање е доставено до Кризниот штаб и вели дека работниците со кои секојдневно се во контакт се плашат за своето здравје.
-Очекувам конфекциите да бидат затворени бидејќи не почитуваа ниту една од мерките, ниту една од уредбите, ниту една од препораките. Секоја чест на ретките исклучоци коишто се оградија од останатите, а за оние кои не ги почитуваа барам и кривична одговорност бидејќи не се грижеа ниту за здравјето на работниците, ниту пат беа свесни за колективното здравје на еден град како што е Штип. Ми е жал за останатите сопственици коишто организираа сопствен превоз што ќе бидат и они на удар поради несовесните превозници и несовесните сопственици на конфекции, вели Ампева.